انت شفاف وترف حد النخاع (( محمد الكعبي ))

انت شفاف وترف حد النخاع

وبجمالك ؟؟ .. لا أكيد انته الشرس

ما تضل خطوات جدمك عالتراب

لان جدمك لو مشه يهمس همس

وانته ربك يعرفك گد ما رقيق

فوگ خصرك كتب ممنوع اللمس

وانته عينك دائرة حفظ النظام

وحاجبك للدائرة واكف حرس

اجت شمس الله اعله خدك من غفيت

نور رادت من خدودك تقتبس

وانته البخدك كواكب مو نجوم

وفوك شفتك شفت مزروعه الشمس

وانته طولك عاصمة ... وصدرك مضيف

الناس من ثكلك تره انحمست حمس

انه اتمنه تسمعني الجواب

خاب احبك درحم بحالي دحس

گبل رافض رفض مشروع الزواج

وبس لمحتك كمت افكر بالعرس.

للشاعر
محمد الكعبي